خلق الشخصيات

                                                      

إزاي أكتب شخصيات مؤثّرة؟

خلاص حددت القصة والحبكة اللي عايز تكتبها وحددت شغفك ورسالتك والعلّة في حياة البطل والإفتراض الأساسي لتوصيل الرسالة. فاضل حاجة كمان قبل ما تبدأ كتابة. الحاجة اللي بتدي للعمل روحه وبتعمل حراك في السرد وتطور للأحداث وتخليك متعلق بالعمل وتفكر في أحداثه وتحط نفسك مكان أبطاله وتعيش حياتهم وتحاورهم وتحلم بيهم أحيانًا. فاضل تخلق شخصيات مؤثرة لروايتك. 

الخلق ده مش مفروض أنه يكون من العدم، أفضل الشخصيات الدرامية على الإطلاق هي المستلهمة من الواقع، وهي الشخصيات الأكثر صدقا وتأثيرًا. مش معنى كده إنك تكتب عن صاحبك أو بنت خالتك، لكن المقصود بالشخصيات المستلهمة من الواقع هي الشخصيات اللي دمج فيها الكاتب أكثر من شخصية موجودين بالفعل، على سبيل المثال إنك تصادف شخصية مبالغة جدا في حكايتها الخارقة ومواقفها العظيمة، تقرر أن دي هتبقى احدى شخصياتك، تضيف لها علّة أنها كدابة جدا لمداراة واقع أقل من توقاعتها، تضيف لها شكل بنت خالتك اللطيف المميز بشعرها الطويل وإهتمامها الزائد بنفسها، تضيف لها طبع صاحبك الندل اللي بيحب صحابه لكن عمره ما سندهم. خلاص كده إنت خلقت شخصية واقعية مدمجة مفيش زيها في الحقيقة رغم إنها حقيقية جدا.

كده خريطة الرواية واضحة بالنسبة لك، عندك شخصية رئيسية بالفعل (وده مهم ومن غيره هتكون الرواية ضعيفة) وعندك شخصية الخصم اللي بتعارض الشخصية الرئيسية وتقف في طريقها، وعندك شخصيات ثانوية (هكتب عن كل شخصية لاحقا)، محتاج في نفس فولدر خريطة الرواية تفتح ملف لكل شخصية هتكتب عنها، ملف يتضمن نقاط معينة وصور تخيلية لأقرب تصور ليك. الملف ده شخصي ومتطلعش عليه القارئ فيما بعد عشان يظل خياله متقد ويتخيل الشكل اللي يروقه مش اللي فرضته عليه. لكن أهمية الملف ده إنك تتعايش مع شخصياتك وتخلق مساحة حميمية إنك تتحاور معاهم وتحافظ على أنماطهم مهما إنقطعت عن الكتابة، وتغيّر فيهم إذا تطلبت الحكاية، وأهم سبب إنك مع المراجعة تتأكد أن كل شخصية كتبتها إتصرفت بالطريقة اللي المفترض تتصرف بيها، ماتكونش شخصية شعبية مثلا وتتكلم بطريقة مثقفة، أو مايكونش شخص عصبي مثلا ويتصرف ببرود.. وهكذا.

أهم تكنيكات خلق شخصية متعددة الطبقات، شخصية من لحم ودم تتلخص في عدة نقاط:

1-تحديد جنس الشخصية وعمرها. مهم جدًا كمان تحدد هتتكلم بلسان الشخصية ولا لسان الراوي، على سبيل المثال لو شخصية طفل وهيتكلم بذاته طريقة تفكيره وحواره الذاتي هتختلف عن لو كان مكتوب من خلال راوي يقدر يعبر عنه بشكل أفصح. كذلك نوع الرواية بيحدد جنس الشخصية الرئيسية، لو كانت رومانسية يبقى أفضل تكون الشخصية الرئيسية فتاة لأنها هتكون الأكثر تأثرًا والأرهف إحساسًا. الشخصية الواحدة كمان ممكن تفكر وتتكلم بطرق مختلفة لو كانت مرت بإنعطافة في حياتها أو لو كانت مرت مدة زمنية كبيرة. كل ده لازم يكون في الحسبان.

2-الهدف. كل شخصية لازم يكون لها هدف، حتى لو كان بسيط زي إنها عايزة تخس مثلًا، أو عايزة تعرقل مسيرة البطل الرئيسي أو عايزة تصل لحقيقة ما أو مرحلة ما. والهدف نوعين: هدف عام كبير زي مصلحة الوطن، أو دافع أخلاقي لتغيير المجتمع أو حماية العائلة، وهدف صغير، خفي، زي إنه يلاقي حبيب، إنه يوفر مصاريف السفر، إنه يكوّن صداقات. أي شخصية تفتقد لهدف بتحاول تحقيقه هي في الغالب شخصية غير مكتملة ومش هتفيد في تطور الأحداث.

3-العلّة والعقدة. العلّة إتكلمنا عنها قبل كده، اللي من غيرها الشخصيات بتكون wooden characters' شخصيات خشبية، شر مطلق أو خير مطلق. ضروري الشخصية تكون Rounded يعني مزيج من خير وشر عشان القارئ يحس إنها شبهه من لحم ودم، زي تاجر المخدرات اللي متوكل على الله وعنده روحانيات عالية، أو زي شخص محترم ومخلص لكنه سلبي وجبان، زي فتاة ليل بتتمنى تعمل عمرة، وزي بنت بريئة نفسها تدخّن وتحشش. خلينا متفقين إن مفيش قتال قتلة بيرجع يقتل ولاده لما يتعصب!. العلّة بتكون شيء مستديم في الشخصية أو شيء طرأ عليها، وهي في الغالب محرك الأحداث لأنها الشيء اللي بيسعى البطل لتغييره طول الرواية.

أما العقدة هي المشكلة اللي بتحاول الشخصية تغيرها، بتكون ظاهرة للقارئ كعقدة خارجية زي إنه بيبحث عن إبنه المخطوف أو إنها بتحاول تتجوز عشان ترضي المجتمع. وهناك طبعًا العقدة الداخلية اللي هي العلّة، واللي مبتتكلمش عنها الشخصية بشكل مباشر وبتظن إن عقدتها خارجية فقط، لكنها بتظهر خلال الأحداث وبتمثل خطر لو عرفتها الشخصية الخصم اللي بتحاول تعارض وتعرقل الشخصية الرئيسية.

4-مواصفات الشخصية: طباعها، قيمها، أحلامها، تفضيلاتها، مخاوفها، هوايتها، الأماكن اللي بتحبها، الألوان، نمط الثياب، طريقة السير، لزمات الكلام، طبقة الصوت، كل شيء تخيلته عنها إكتبه. لكن مش هتستخدم في الرواية إلا ما يفيد نصك فقط. 

5-الخلفية الحياتية للشخصية. مهم تعرف ككاتب شخصيتك نشأت إزاي وفين ومنين نشأت عقدتها الداخلية أو علّتها. وبيكون لطيف كمان للقارئ إنه يفهم تاريخ الشخصية اللي بيقرأ عنها وماضيها.

6-نقطة الضعف. أو زي ما بيسموها "كعب هركليز". الشخصيات المؤثرة ضروري يكون عندها نقطة ضعف، إما في شخصيتها أو في مشاعرها. نقطة الضعف اللي بتكون عاملة عامل تهديد خلال الأحداث، واللي ممكن تكسر الشخصية في أي لحظة وتخليها تنهزم فورًا. 

7-تجنب قدر الإمكان ال Stereotype. يعني الشخصية النمطية، المأذون اللي لابس جبة وعمة وقفطان، الدكتور الجشع، رجل الأعمال الفاسد، الموظف المرتشي، المجذوب المهووس، أخلاق الحارة وجدعنة ولاد البلد. كل هذه الأفكار النمطية حاول قدر الإمكان تبعد عنها، حتى لو انت شايفها حقيقة، اخرج عن المألوف، متخليش القارئ يقفل الرواية ويكمل الأحداث في خياله على نفس الخط النمطي اللي صدرته ليه. 

8-المواصفات الشخصية. حاليا بقت دي أقل النقاط أهمية في كتابة الشخصية. حتى القارئ مبقاش مهتم بيها زي زمان من كتر ما بقت نمطية وغير مفيدة. وفي قاعدة عامة في الكتابة إن أي شخصية أو فقرة أو حتى جملة لا تضيف للنص يجب حذفها. بتستخدم فقط لو في حاجة مميزة في الوصف الخارجي للشخصية هتفيد في فهم الأحداث بعد كده أو في التعلّق بالشخصية.

9-الاسم. في خدعة ظريفة زي تمرين كتابي إنك تغير أسماء شخصيات روايتك أثناء كتابتها وتراقب شعورك إيه. أنا جربتها ومنجحتش معايا ومقدرتش غير إني أستخدم أول إسم اخترته للشخصية. لكن ممكن تجربوها لو تحبوا. وبالطبع مبقاش ظريف إستخدام إسم يعبر عن الشخصية زي إن حنان تكون حنونة ورعد راجل شرير وجميلة بنت جميلة وصقر راجل شجاع. ده نمط قديم ومستهلك، الأفضل تختار أسماء مميزة ومش متكررة في أعمال سابقة وتكون مرتبط بيها نفسيا وروحيا.

10- ياللا إتفضلوا إكتبوا مستنيين إيه؟