إزاي أتعلم الكتابة؟
سؤال ممكن إجابته بكلام كتير نظري ونصائح من نوعية: اقرأ كتير وحسن لغتك واتمرن على الكتابة، الموضوع زي ما كتب د.أحمد خالد توفيق بيشبه بالظبط السؤال عن كيفية صنع الزهرة أو خلق الماء أو الندى. والحقيقة هي أنك إما أن تولد كاتبا أو لا تولد. كل ورش الكتابة والكتب والمقالات عن الكتابة مش ممكن تساعد غير كاتب عنده موهبة فطرية وناقصه اكتساب التقنيات والأدوات. فخلينا متفقين إن مفيش حاجة إسمها تعلّم الكتابة بنفس مفهوم تعلّم الطبخ أو تعلّم صنعة ما. لكن في حاجة إسمها تطوير موهبة الكتابة عن طريق القراءة عنها والجهد والمداومة والانتباه للعالم المحيط بك.
الكتابة مبتنزلش زي الوحي، لكنها بتنبع من داخل الإنسان زي الفطرة أو الرغبة، من الطبيعي انها تتطور من مجرد فضفضة ذاتية لكتابة قصص قصيرة أو مقالات لحد ما توصل لكتابة الرواية ودي أمتع مرحلة في الكتابة. فكرة بتنسج حولها عدة أفكار وتربطهم بأحداث وشخصيات، عالم كامل بتخلقه. في مصادر كتير لقراءة تاريخ الرواية وطريقة كتابتها. اللي هحاول أعمله اني هكتب مقالات كتابة الرواية من خلال قراءتي وخبرتي الصغيرة في نشر عدة روايات وورش كتابة رواية حضرتها أونلاين باللغة الإنجليزية. هكتب المقالات دي بغرض مساعدة نفسي قبل الآخرين. زي ما مدرس الفيزياء قال لإبني: تعرف إيه أفضل طريقة اتعلمت بيها الفيزياء؟ إني أعلمها للناس.
أول وأهم شيء لما تخطر في بالك فكرة رواية، دوّنها فورا. اشتغل عليها في فولدر منفصل. أنا بسميه "الخريطة" أول حاجة تكتبها في الخريطة ملخص للرواية. لو مكتبتش ملخص تبقى مش عارف انت عايز توصل لإيه. هناك في الخريطة تقدر تكتب أهم عناصر روايتك. الزمان بالتواريخ، المكان بتفاصيله، الشخصيات وتسلسل الأحداث. اكتبهم بالشكل اللي يريحك. أنا بكتبهم في نقاط، ولكل شخصية اكتب المعالم الأولية. مع الكتابة هتكتشف حاجات أكتر عن الشخصيات وتضيف لهم صفات ولزمات وتفاصيل. كذلك الأحداث هتتكشف لك وممكن تغير في مسارها. كل تغيير ضيفه للخريطة عشان لو توقفت فترة عن الكتابة تقدر ترجع للخريطة تفكرك بمسار الأحداث والشخصيات.
لو روايتك لها بعد تاريخي أو سياسي أو طبي اقرأ عنه وقرب من أجواءه بكل الطرق، اتكلم مع ناس مرت به، لو المسافات بعيدة الانترنت بيقرب البعيد، خلي عندك مصادر في كتابتك، الجزء المنطقي الواقعي منها على الأقل. لو مهتم تبدأ الكتابة أبدأ لكن متغفلش البحث عن كل اللي هتقدمه فيها من معلومات مهما كانت بسيطة.
إختار مكان جيد للكتابة. وقت بجودة عالية محدش هيقاطعك فيه، توقيت يكون قلبك مفتوح فيه ومشاعرك على المحك. إختار أدوات جديدة ومبهجة. احتفي بالكتابة وقدم لها كل ما تحب.
اكتب دائما عن موضوع بيهمك وبيشغلك، أي كتابة متألفة لمجرد الكتابة أو لاتباع تريند معين عمرها ما هتوصل للقارئ. تجنب الأفكار الوعظية والطرق المباشرة في توصيل الأفكار لأنها بتضيع سحر الرواية في كشف الحقائق بطرق متوارية وتعرية المشاعر. خالد الحسيني بيقول «اكتب القصة التي ترغب أن تحكيها وتقرأها، اكتب عن الأشياء التي تحدث تحت جلدك وتجعلك مستيقظا في الليل» متفكرش في وقعها على القارئ، أو إذا كانت تهم حد غيرك. فكر إنك عملت أمتع شيء في الوجود.. كتبت.
تمرين كتابي: لو بدأت تكتب رواية أو دوّنت فكرتها اكتب ملخص لها في صفحة واحدة واقرأه لنفسك بصوت عالي أو سجله واسمعه. تأكد أن هو ده اللي عايز تكتبه.
No comments:
Post a Comment